Auteur: yullal
Date: 2001-06-07 13:36:16
sghur mouloud mammeri.
i kecc a Muhand azwaw de tezzyiwin-ik adlis-a, ad ak d-yefk yiwen wudem n tmusni, ad ak d-iqqim d tagejdit ad ak d-ittales
ayen gan d wayen nnan imezwura inek. M'ara t-walin medden , ammar ad il win ara d ak yinin :
- "Tigi d tihkayin n zikenni, d timucuha n teryel i yess sedhuyen arrac. i wacu d agh nfaant tmucuha n zik i nekwni s at
tura? Edj timucuha n zik i yat zik ; nekwni d arraw bbwass-a ,
ass-a deg irgazen ulin s aggur, rsen degs. Ass-a deg yiwet takurt tezmer atzebbwa tamdint tameqqwrant deg wesmenghar n tit" .
Inn-asen:
-tamusni tekka nnig teswiaain. Ur ttilit ara ay imedhac d arrac
issedhec uclawa, ismenfayen arelluc aberreqmuc i yittij ireqqen negh i wewregh yuli ughebbar.
-Inn-asen:
Awregh yif arelluc, ulac akw n teqrint gar-asen ; awregh kkes-as
aghebbar ad yirriq. Arelluc cwit ma icellec it d acellef ad iddegdeg d ticeqfafin tizraraqin.
-Inn-asen:
Awer tedru yidwen ay at tura am seklu mi gezmen izuran: di tazzwara zegzaw yifer-is, di teswiaat selaw ider. Ttejra mebla
izuran... leqrar-is d tamettant. Awer tilim ay at tura d isekla war izuran.
-Inn-asen:
Tamacahutt d ajlaln tmusni. Kkes ajlal iwakken ad-dher temsirt
yellan ddaw-as, acku ...
Acku tamusni, ghas tettabaa lewquat, ur teqqin ara gher-sen
s umrar ur gezzmen lemqas. Si tallit gher tayed tettbeddil tussna, tamusni ur tett beddil ara. Si tallit gher tayed ay
gett beddillen di tmusni d ssifa n sufella , macci d ixf n daxel.
Maca, taghawsa tis-nat, a Muhend ,macci d lwert kan, macci agwni mi d-zzin leswar. Awan n tmusni d antag d tikli gher sdat.
Ma tgid-as algam tenghid-t.
A Muhend, ur as tegg ara algam i tmsni. Anida tt-issawed ldjehd
ufud is tawid-tt; ma s aggur edj tamusni attali s aggur; ma awan-is d asemhelleq i ddunit d wayen illan, anef i tmusni atsemhilleq i dunit.
Taghawsa tis-krad, tamusni a Muhend d asafu.
D asafu n tafat: edj asafu ad ifu izuzef tillas.
Tamusni d asafu n wurghu : edj asafu ad issegh ayen irkan,
d wayen iblan ur nesaai izuran. Eg-as d asaber ghef ayen ilhan,
ghef ayen ilhan deg berdan d amsebrid macci d amentran.
Tamusni d asafu: wa yettak-it i wa, iwakken ad yezg dayem yaala,
urdjin yettendella negh yulwa negh iqqim am gherrus di tesga.
Hedregh yemmut umghar aneggaru d ittawin abrid n tmusni.
Nebbwi tafekka s gher uzekka ideg ara yentel. Mi nerra akal fell-as nughal-ed, nettems muqal am wisraan la d ittakwi.
Indel usafu garnegh isseg d nettagwem tafat.
Assen, a Muhend, i k-id mmektigh, i s-negh :
- Ay imaazan gg ibbwas, ghurwat attughalem d inehyaf n kullas
si tmusni d tmughli taghezzfant, d tulya bbul d laaqel.
Mmktigh-k-id, mi mmktigh-k-id akw ...tisutwin ara d immlen.
Amusnaw aneggaru nnetl-it, daa nentel yides tamusni ?
Ulac tijmuyaa d igrawem ideg ara thefdem tamusni akken tt-hefdem
imezwura nnwen. Tura tamusni tughal s idlisen.
Deg-mi iy urigh adlis-a i kecc, a Muhend, d tezzyiwin ik, ad d iqqim d tagejdit iw senned , d tagejdit i lebni.
|
|
